ᐃᖃᓗᐃᑦ, ᓄᓇᕗᑦ – ᔫᓂ 5, 2026 ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ (QIA) ᑲᑎᒪᔨᖏᑦ ᐊᖏᕐᓯᓚᐅᖅᑐᑦ $10 ᒥᓕᐊᓐᓂᑦ ᐱᕈᕐᐸᓪᓕᐊᑎᑦᑎᔾᔪᑎᔅᓴᓂᑦ ᓄᓇᖃᖅᑳᖅᑐᓂᑦ ᐃᓪᓗᓕᕆᓂᕐᒧᑦ ᓄᓇᓕᓐᓂᓪᓗ ᐱᕈᕐᐸᓪᓕᐊᑎᑦᑎᓂᕐᒧᑦ ᑮᓇᐅᔭᖏᑎᒍᑦ ᐃᑲᔫᑕᐅᓂᐊᕐᖓᑕ ᓴᓇᔭᐅᓂᐊᖅᑐᓄᑦ ᓄᑖᓄᑦ ᐸᐃᕆᕕᔅᓴᓄᑦ ᓯᕗᓕᕐᓯᓪᓗᑎᒃ ᑲᑭᕙᒃ ᑲᑐᔾᔨᖃᑎᒌᒃᑯᑦ ᕿᑭᖅᑕᓂ ᓄᓇᓕᓐᓂᑦ.
ᐱᕈᕐᐸᓪᓕᐊᑎᑦᑎᓂᖅ ᐱᕕᖃᖅᑎᑦᑎᓂᐊᖅᑐᖅ ᑲᑭᕙᒃ ᑲᑐᔾᔨᖃᑎᒌᒃᑯᓐᓂᑦ ᑲᔪᓯᑎᑦᑎᓂᕐᒧᑦ ᐸᐃᕆᕕᓐᓂᑦ ᓴᓇᖃᑦᑕᓂᕐᒧᑦ ᐱᓇᓱᐊᒐᖏᓐᓂᒃ, ᑖᒃᑯᐊᖑᓪᓗᑎᒃ ᐸᐃᕆᕕᓕᐅᕐᕕᐅᓂᐊᖅᑐᑦ ᐊᔾᔨᒌᙱᑐᒡᒍᑎᐅᓪᓗᑎᒃ ᐱᕙᓪᓕᐊᑎᑕᐅᓂᖏᑦ ᐅᑯᓇᓂ ᓴᓂᕋᔭᒃ, ᐃᒃᐱᐊᕐᔪᒃ, ᒥᑦᑎᒪᑕᓕᒃ ᐊᒻᒪᓗ ᑲᖏᖅᑐᒑᐱᒃ. ᑮᓇᐅᔭᒃᑲᓐᓃᑦ ᐃᑲᔫᑎᖃᕐᓂᐊᖅᑐᑦ ᐊᒥᓱᕈᖅᑎᑦᑎᒋᐊᒃᑲᓂᕐᓂᕐᒥᒃ ᑕᓪᓕᒪᒋᔭᐅᓂᐊᖅᑐᒥᒃ ᓄᓇᓕᓐᓂᑦ, ᐸᓐᓂᖅᑑᖅ ᓇᓗᓇᐃᖅᑕᐅᓯᒪᔪᖅ ᑐᔅᓯᕋᐅᑕᐅᓯᒪᓂᖓᓂᒃ, ᑖᓐᓇ ᒪᓕᓐᓂᐊᕐᒥᔪᖅ ᓄᓇᔅᓴᖓᓂᒃ ᓈᒻᒪᑦᑐᒥᒃ ᐊᑐᐃᓐᓇᖅᑕᖃᓕᖅᑲᑦ ᓴᓇᕕᐅᒐᔭᕐᖓᑦ.
ᑕᒪᕐᒥᒃ, ᕿᑭᖅᑕᓂᒃᑯᑦ ᑲᑭᕙᒃᑯᓪᓗ ᐃᖅᑲᓇᐃᔭᕐᖓᑕ ᐊᒥᓱᕈᖅᑎᑦᑎᕙᓪᓕᐊᓪᓗᑎᒃ ᓈᒻᒪᑦᑐᓂᑦ ᐸᐃᕆᕕᓐᓂᑦ ᐋᖅᑭᔅᓱᐃᕙᓪᓕᐊᓯᓐᓈᑦ ᓄᓇᑦᑎᓐᓂ ᐃᖅᑲᓇᐃᔮᔅᓴᓂᑦ, ᓴᓇᔪᓕᕆᓂᕐᒥᒃ ᐃᓕᓐᓂᐊᑎᑦᑎᖃᑦᑕᓂᕐᒥᒃ, ᐊᒻᒪᓗ ᒪᑭᒪᓇᓱᐊᕈᑎᓂᑦ ᐱᕙᓪᓕᐊᑎᑦᑎᓂᕐᒥᒃ.
“ᑕᒪᒃᑯᓂᖓ ᐸᐃᕆᕕᓐᓂᑦ ᐋᖅᑭᔅᓱᐃᓂᖅ ᐊᖏᔪᒥᒃ ᐊᐅᓚᔾᔭᐃᒍᑕᐅᓂᐊᕐᖓᑦ ᐃᓅᓯᖏᓐᓄᑦ ᓄᓇᖏᓐᓂ,” ᐅᖃᖅᑐᖅ ᑲᑭᕙᒃ ᑲᑐᔾᔨᖃᑎᒌᒃᑯᑦ ᐃᔅᓯᕙᐅᑕᖓᑦ ᐋᑕᒥ ᐃᑦᑐᐊᑦᓯᐊᖅ, “ᓴᓂᕐᕙᐃᓗᑕ ᓄᑖᓂᑦ ᑮᓇᐅᔭᓂᑦ ᑕᐃᒫᒃ ᖃᐅᔨᒪᓇᑦᑎᐊᓂᐊᕐᖓᑦ ᐃᓄᐃᑦ ᕿᑐᕐᖓᖏᑦ ᐱᐅᔪᓂᑦ ᐸᐃᕆᔭᐅᕕᖃᖃᑦᑕᓂᐊᕐᖓᖅ ᐃᓕᓐᓂᐊᕆᐅᕐᓴᕕᒋᖃᑦᑕᖅᑕᖏᓐᓂᒃ, ᐃᖅᑲᓇᐃᔭᖅᑎᑦᑎᕕᐅᓂᐊᕐᖓᑕ ᐊᒥᓲᓂᕐᓴᓂᑦ ᓄᓇᓕᓐᓂᑦ ᐊᒻᒪᓗ ᐃᓕᓐᓂᐊᑲᓐᓂᕈᑕᐅᖃᑦᑕᓂᐊᕐᖓᑕ ᑭᒃᑯᑐᐃᓐᓇᕐᓄᑦ ᑕᒪᑐᒧᖓ ᐱᓇᓱᐊᕈᑎᖃᕐᐸᑦᑐᓄᑦ ᓴᓇᔪᓕᕆᓂᕐᒥᒃ.”
“ᐊᑐᐃᓐᓇᖃᕐᓂᖅ ᐊᑭᓕᓐᓂᑦ ᐅᓇᒻᒥᓇᕐᔫᒥᔪᓂᑦ, ᐱᐅᔫᑎᐊᓗᓐᓂᑦ ᐸᐃᕆᕕᓐᓂᑦ ᐊᑑᑎᖃᓪᓚᕆᒻᒪᑕ ᒪᑭᑕᑦᑎᐊᕈᑕᐅᓂᐊᕐᖓᑦ ᖃᓄᐃᙱᑎᐊᕐᓗᑎᓪᓗ ᓄᓇᓖᑦ,” ᐅᖃᖅᑐᖅ ᕿᑭᖅᑕᓂᒃᑯᑦ ᐊᖏᔪᖅᑳᖓᑦ ᐅᓛᔪᒃ ᐊᑭᓱᒃ. “ᑕᒪᑐᒥᖓ ᐱᕈᕐᐸᓪᓕᐊᑎᑦᑎᓂᖅ ᓴᖅᑭᔮᖅᑎᑎᒻᒪᑦ ᕿᑭᖅᑕᓂᒃᑯᑦ ᑲᑦᑐᖓᐃᕈᑎᒋᓯᒪᔭᖓᓐᓂᒃ ᐃᑲᔪᕐᓂᕐᒧᑦ ᐃᓄᓐᓂᑦ ᐃᓚᒌᓂᑦ, ᐊᒥᓱᕈᖅᑎᑦᑎᒋᐊᒃᑲᓐᓂᕈᑕᐅᓪᓗᓂᓗ ᐱᓇᓱᐊᕋᔅᓴᓂᑦ ᓱᕈᓯᕐᓄᑦ ᑐᕌᖓᔪᓂᑦ, ᐊᒻᒪᓗ ᓴᓇᓂᕐᒧᑦ ᓄᓇᓕᓐᓂᑦ ᐱᖁᑎᕐᔪᐊᓂᑦ (ᓄᓇᓕᓐᓄᑦ ᐊᐅᓚᔪᓐᓇᐅᑎᓂᑦ) ᐱᑕᖃᕆᐊᓕᓐᓂᑦ ᐊᑑᑎᓂᐊᕐᖓᑕ ᑭᙴᒪᑦᑎᖃᑦᑕᑎᓪᓗᒋᑦ ᓄᓇᓕᕗᑦ ᐃᓄᒋᐊᔅᓯᕙᓪᓕᐊᑎᓪᓗᒋᑦ.”
ᑖᓐᓇ ᐱᕈᕐᐸᓪᓕᐊᑎᑦᑎᒍᑕᐅᓂᐊᖅᑐᖅ ᑲᒪᒋᔭᐅᕙᓪᓕᐊᓕᕋᑖᖅᑎᓪᓗᒍ, ᕿᑭᖅᑕᓂᒃᑯᑦ ᑲᑦᑐᖓᐃᕈᑎᓖᑦ ᑕᒪᕐᒥᒃ ᑲᑎᑦᑐᒋᑦ $25 ᒥᓕᐊᓐᓂᑦ ᑐᕌᖓᔪᓂᑦ ᐸᐃᕆᕕᓐᓂᑦ ᓴᓇᔭᐅᑎᑦᑎᓂᕐᒧᑦ ᓯᕗᓕᕐᓯᓪᓗᑎᒃ ᑕᒪᑐᒥᖓ ᑲᑭᕙᒃ ᑲᑐᔾᔨᖃᑎᒌᒃᑯᑦ. ᑲᑭᕙᒃᑯᑦ ᐱᕈᕐᐸᓪᓕᐊᑎᑦᑎᓂᐊᖅᑐᑦ ᑕᒫᓂ $15 ᒥᓕᐊᓐᖏᓐᓃᑦᑐᓂᑦ ᐊᑐᓂᑦ ᐃᓪᓗᓕᐊᖑᓂᐊᖅᑐᓄᑦ. ᑖᒃᑯᐊ ᐱᕈᕐᐸᓪᓕᐊᑎᑦᑎᒍᑕᐅᓂᐊᖅᑐᑦ ᐃᑲᔪᕐᓯᖅᑕᐅᒋᐊᒃᑲᓂᕐᓯᒪᔪᑦ ᑮᓇᐅᔭᖃᖅᑎᑕᐅᓪᓗᑎᒃ ᓄᓇᖃᖅᑳᖅᑐᓂᑦ ᓱᕈᓯᓛᕐᓂᑦ ᐃᓕᓐᓂᐊᕆᐅᕐᓴᑎᑦᑎᓂᕐᒧᑦ ᐸᐃᕆᕕᓕᕆᓂᕐᒧᓪᓗ ᐃᑲᔫᑎᑎᒍᑦ ᐊᐅᓚᑕᐅᓪᓗᑎᒃ ᐃᖅᑲᓇᐃᔮᔅᓴᓂᑦ ᐃᓅᓯᕐᒨᖓᔪᓂᓪᓗ ᐱᕙᓪᓕᐊᔪᓕᕆᔨᒃᑯᓐᓂᑦ ᑲᓇᑕᒥ. ᑖᒃᑯᐊ ᑲᔪᓯᑎᑕᐅᕙᓪᓕᐊᔪᑦ ᑲᔪᓯᒐᔭᓚᐅᙱᑦᑐᑦ ᓯᕗᓕᖅᑏᑦ ᐃᓚᒋᔭᐅᓚᐅᙱᑉᐸᑕ ᐊᒻᒪᓗ ᑮᓇᐅᔭᖅᑖᖅᑎᑕᐅᓯᒪᓚᐅᙱᑯᑦᑕ ᑲᑐᔾᔨᖃᑎᒋᕙᑦᑕᑎᓐᓂᒃ.
ᑲᑭᕙᒃᑯᑦ ᐊᑐᖅᑕᖓᑦ ᐸᐃᕆᕕᓐᓄᑦ ᓂᕆᐅᒍᑕᐅᔪᑦ ᐃᓂᖃᕈᓐᓇᕐᓂᐊᕆᐊᔅᓴᖏᓐᓂᒃ 44ᓂᑦ ᐸᐃᕆᕖᑦ (32 ᓱᕈᓰᑦ ᐅᑭᐅᓖᑦ 3-6, ᐊᒻᒪᓗ 12 ᓱᕈᓯᓛᑦ). ᐃᖅᑲᓇᐃᔮᔅᓴᐃᑦ, ᓴᓇᔪᓕᕆᓂᕐᒥᒃ ᐃᓕᓐᓂᐊᑎᑦᑎᓃᑦ ᐊᒻᒪᓗ ᐊᐅᓚᑦᑎᓂᕐᒧᑦ ᐃᑲᔫᑏᑦ ᐸᐃᕆᕕᓐᓄᑦ ᑲᑐᔾᔨᖃᑎᒌᓄᑦ ᐃᓚᒋᔭᐅᒻᒥᔪᑦ ᑖᒃᑯᓄᖓ ᐊᑐᓂᑦ ᓴᓇᔭᐅᓂᐊᖅᑐᓄᑦ.
ᕿᑭᖅᑕᓂᒃᑯᑦ ᑲᑭᕙᒃᑯᓪᓗ ᑐᑭᓯᓯᒪᔪᑦ ᐱᒻᒪᕆᐅᓂᖓᓂᒃ ᑲᑐᔾᔨᖃᑎᒌᓐᓂᒃ ᐃᑲᔪᖅᑎᒌᓪᓗᓂ ᑲᒪᒋᔭᖃᖅᑎᓪᓗᒋᑦ ᐸᐃᕆᕕᓐᓂᑦ ᐊᒥᒐᕐᓯᖃᑦᑕᓂᕐᒥᒃ ᕿᑭᖅᑕᓂ ᓄᓇᓕᓐᓂᑦ ᐊᒻᒪᓗ ᐱᓇᓱᐊᕋᔅᓴᓕᐅᖅᑐᑎᒃ ᐃᑲᔫᑎᓕᓐᓂᑦ ᐃᓄᐃᑦ ᕿᑐᕐᖓᖏᓐᓄᑦ, ᐃᓚᒌᓄᑦ ᓄᓇᖅᑲᑎᒌᓄᓪᓗ ᓯᕗᓂᔅᓴᑎᓐᓄᑦ ᑎᑭᑦᑐᒍ.
ᑐᓴᒐᒃᓴᕐᒃ
ᑐᑭᓯᒋᐊᒃᑲᓐᓂᕈᒪᒍᔅᓯ ᑐᑭᓯᒋᐊᕐᕕᐅᖃᑦᑕᕐᓕ:
ᑭᐅᕋᓐ ᕙᓚᕋᑎ
ᑐᑭᒧᐊᑦᑎᑦᑎᔨ, ᑐᓴᐅᒪᖃᑦᑕᐅᑎᑦᑎᔾᔪᑎᓄᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ (ᐅ) 867.975.8398 ᐅᖓᓯᑦᑐᒥᓪᓘᓐᓃᑦ ᐊᑭᖃᙱᑐᒃᑯᑦ 1.800.667.2742
kflaherty@qia.ca
ᐅᐃᓪ Hᐊᑉᑭᓐᔅ
ᐊᐅᓚᑦᑎᔨ,ᑐᓴᐅᒪᖃᑦᑕᐅᑎᔾᔪᑎᓄᑦ, ᓂᐅᕐᕈᑎᖃᕐᓂᕐᒨᖓᔪᓂᑦ ᐊᒻᒪ ᑐᓴᐅᒪᑎᑦᑎᖃᑦᑕᓂᕐᒧᑦ
ᑲᑭᕙᒃ ᑲᑐᔾᔨᖃᑎᒌᒃᑯᓐᓂ
867.979.8966
whopkins@kakivak.ca